საქართველოს მთავრობამ რეგიონებში განსახორციელებელი პროექტების, მთის ფონდების, განათლების, ინფრასტრუქტურისა და სოფლის მხარდაჭერის პროგრამების ფარგლებში დაფინანსებული პროექტების შესრულების 6 თვიანი ანგარიშის პრეზენტაცია გამართა.

როგორც პრემიერ-მინისტრმა მამუკა ბახტაძემ თქვა, ძლიერი რეგიონები ნიშნავს ძლიერ საქართველოს, ამიტომ რეგიონალური განვითარება ხელისუფლების უმნიშვნელოვანესი პრიორიტეტია.

პრემიერ-მინისტრის თქმით, 2019 წელს ინფრასტრუქტურული პროექტების დაფინანსება 20%-ით გაიზარდა, რაც დამოუკიდებელ საქართველოში ყველაზე მაღალი მაჩვენებელია, რადგან ჯერ კიდევ გასულ წელს, რეგიონულ მმართველობაში იყო პრობლემები, რომელიც ინვესტიციების ვერ ათვისებაშიც გამოიხატებოდა, მაგრამ მართვის სტრუქტურა და პროცედურები შეცვალეს და ამას შედეგები მოჰყვა.

ბახტაძის ინფორმაციით, წლის პირველი 6 თვის მონაცემებით, რეგიონული განვითარების და ინფრასტრუქტურის სამინისტრომ ინფრასტრუქტურაში განახორციელა 200 მილიონი ლარით მეტი ინვესტიცია.

„რეგიონალური განვითარება ეს არის სასიცოცხლო მიმართულება. აუცილებელია, რომ საქართველოში მივაღწიოთ ინკლუზიურ ზრდას, რომელიც შესაძლებელია სწორედ ჩვენი რეგიონების განვითარებით“ - განაცხადა პრემიერ-მინისტრმა. მისივე თქმით, ეროვნული მნიშვნელობის პროექტების გარდა, რეგიონებში ჯერ კიდევ გასაკეთებელია ადგილობრივი მნიშვნელობის პროექტები, მათ შორის გზები, წყლის სისტემები და სპორტული და განათლების ინფრასტრუქტურა.

„მსურს ყველა კიდევ ერთხელ დავარწმუნო, 2022 წლის ჩათვლით, როგორც შევპირდით ჩვენს მოქალაქეებს, საქართველოს ექნება ყველაზე თანამედროვე ინფრასტრუქტურა, რომელიც მოგვცემს იმის საშუალებას, რომ უფრო მეტად განვავითაროთ ეკონომიკა, კიდევ უფრო მეტი მოქალაქე ჩავრთოთ ეკონომიკურ განვითარებაში და როგორც შედეგი, ერთობლივი ძალებით დავძლიოთ სიღარიბე. რეგიონული განვითარების გარეშე წარმოუდგენელია საქართველოში სიღარიბის დაძლევა“ - თქვა პრემიერ-მინისტრმა მამუკა ბახტაძემ.

რეგიონული განვითარების და ინფრასტრუქტურის მინისტრის, მაია ცქიტიშვილის ინფორმაციით კი წელს შესასრულებელია 400 მილიონი ლარის 6700 პროექტი, რომელსაც თვითმმართველობები ახორციელებენ სამინისტროს აქტიური ჩართულობით.